បន្ទាយមានជ័យ៖ កាលពីរសៀលថ្ងៃទី១១ ខែមករា ឆ្នាំ២០២៣ ក្រុមអ្នកជំនាញរុះរើសំណង់អគារ បានរកឃើញសាកសពម្នាក់ទៀតហើយដែលឆេះស្លាប់ក្នុងអគារកាស៊ីណូ «ហ្គ្រែនដាម៉ិន ស៊ីធី» និងកាស៊ីណូ «ប៉ោយប៉ែតរីសត» ស្ថិតក្រុងប៉ោយប៉ែត ខេត្តបន្ទាយមានជ័យ។

សមត្ថកិច្ច និងក្រុមការងាររុះរើបានបញ្ជាក់ឱ្យដឹងថា សាកសពម្នាក់ទៀតនោះ ត្រូវបានប្រទះឃើញនៅថ្ងៃទី១១ ខែមករា ឆ្នាំ២០២៣ ក្នុងអគារសណ្ឋាគារជាន់ទី១០ ត្រង់បន្ទប់ទឹករួម។

បើយោងតាមសមត្ថកិច្ចដដែល សាកសពត្រូវបានដឹកមកធ្វើកោសល្យវិច្ឆ័យនៅមន្ទីរពេទ្យបង្អែកក្រុងប៉ោយប៉ែត ដោយលទ្ធផលបញ្ជាក់ថា ជនរងគ្រោះនោះស្លាប់ដោយសារតែឈ្លក់ផ្សែងភ្លើងបណ្តាលឱ្យថប់ដង្ហើមស្លាប់ ដោយសាកសពឆេះរោលពេញខ្លួន ហើយនៅលើដងខ្លួនសាកសពមានពាក់ខ្សែក ខ្សែដៃ និងនាឡិកា ទើបសមត្ថកិច្ចជំនាញអាចកំណត់សម្គាល់លើអត្តសញ្ញាណសព គឺជាជនជាតិថៃ អាយុ ៥៨ឆ្នាំ កាន់លិខិតឆ្លងដែនលេខ AB1916225 ឈ្មោះ ចាវីវ៉ាត ភឺចាប៉ាល់ ( Chavivat peechapol)។

បច្ចុប្បន្នសាកសពជនរងគ្រោះ ត្រូវបានរក្សាទុកក្នុងបន្ទប់រក្សាសាកសពនៅមន្ទីរពេទ្យបង្អែកក្រុងប៉ោយប៉ែត រង់ចាំសាច់ញាតិមកទទួល។

សាកសពដែលរកឃើញចុងក្រោយនេះ សរុបមកគឺមានសាកសពចំនួន ២៧នាក់ហើយ ដោយភាគច្រើនជាជនជាតិបរទេស ក្នុងនោះមានអ្នករងរបួសជិត ៦០នាក់ ក្នុងហេតុការណ៍ឆេះកាស៊ីណូក្បែរច្រកព្រំដែនអន្តរជាតិក្រុងប៉ោយប៉ែត កាលពីយប់ថ្ងៃទី២៨ ខែធ្នូ ឆ្នាំ២០២២៕